Teolog trur Satan har éin suksessfull, og éin mislykka strategi

Han var generalsekretær i Åpne Dører mellom 2008-2012, ein organisasjon som arbeider med forfølgde kristne i heile verda.

Sjølv har Stig Magne Heitmann jobba mykje med spørsmålet om kva som er grunnen til at kristne blir forfølgd.

I det som er søndagens tekst i kyrkjeåret åtvarar Jesus mot å forføre.

Kven er størst i himmelriket?

Disiplane var ute å gjekk då dei spurte Jesus kven av dei som vil vere størst i himmelen, men svaret var nok ikkje som forventa.

Jesus snudde opp ned på spørsmålet. Ein skal ikkje gjera seg sjølv stor, men som eit lite barn for å bli stor i himmelriket.

Samtidig formanar han med streke ord mot å forføra dei minste blant oss.

Forføring i Noreg

Heitmann seier det er ein grunn til at det er lite forfølging av kristne i Noreg, nemleg at det er mykje forføring.

– Den som står i mot forføring risikerer forfølging. Det er ein raud tråd i heile Bibelen, seier han.

Teologen meiner forføringa sløvar ned moralen vår.

– Forføring er mykje verre enn forfølging. Det som er ille med forføring er at ein som oftast ikkje skjønnar det, når ein sjølv er råka av det. Den kjem både frå utsida, altså frå samfunnet, og frå innsida, altså frå vår eigen lyst til å gjera det vonde, seier han.

Kampen

Heitmann trur dei kristne står i ein kamp mot forføraren, som han meiner er Satan.

– Kampen handlar om gudsbildet. Liberalteologien stiller spørsmål om Den treeinige Gud, Jesu person og truverda til Bibelen og ikkje minst om Bibelens etikk.

Dette tenker teologen er ulike variantar av spørsmålet «har Gud verkeleg sagt?», som slangen stilte Eva i Edens hage før syndefallet.

Han understrekar at kampen ikkje er mot samfunnet.

– Vi kjemper ikkje mot menneske, men mot djevelen og hans hær. Vår oppgåve er først og fremst å vere lys og salt i verda, og å leve på ein annleis måte, seier han.

To strategiar

Heitmann trur Satan har to strategiar for å føre folk bort frå trua på Jesus, nemleg forføring og forfølging.

Likevel meiner han berre éin av dei har suksess.

– Det endelege målet til djevelen er alltid å føre folk til fortaping. Då må han få folk bort frå trua, Guds ord og sanninga. Forføring fører ein alltid bort frå Jesus, men forfølging er motsett, det fører ein alltid nærmare Gud

Heitmann trur samtidig at forfølging ikkje er noko ein skal ta lett på.

– Står ein imot forføringa, blir ein gjerne forfølgt – av samfunnet, rettsvesenet, familien, arbeidsplassen og så vidare. Det har vi fleire vitnemål om i Åpne Dører.

Det trur han såkalla konservative kristne opplever mykje av.

– Vi må rekne med at når vi held fram Guds ord vil vi få problem, det er eit press frå samfunnet som seier: No må dei skjønne at vi lever i 2022.

Guds fulle rustning

Heitmann trur kristne i Noreg kan stå imot forføringa, vist dei vil.

– Ein må kle seg i «Guds fulle rustning». Det inneber å lese Guds ord, be, ha fellesskap med andre kristne og ikkje minst vedkjenne synd.

Teologen trur skriftemålet er avgjerande.

– Tar vi eit oppgjer med syndene våre, har vi eit sterkt vern når Satan prøver å forføre oss, seier han.