Ver uthaldande i bønn, seier Jesus. Håkon har halde på i 60 år

Han var 16 år då han fekk ei sterk erfaring som skulle sette ei ny retning for livet.

På eit bønnemøte i Bodø for rundt 60 år sidan opplevde Fagervik at Gud kalla han til å bli evangelist. Sidan den gong har han reist rundt i landet og forkynt.

Men eitt kall har alltid vore viktigare for han, nemleg å be.

I søndagens tekst seier Jesus at disiplane må halde ut i bønn.

Enka og dommaren

Jesus er ute med disiplane då han fortel dei ei likning som oppmodar disiplane til be kontinuerlig.

Ei enke går til ein urettferdig dommar og ber om rettferd i ei sak han kan dømma i.

Dommaren er motvillig, men til slutt gir han etter fordi enka er så pågåande.

– Jesus prøver å seie at når sjølv den urettferdige dommaren gir etter, kvifor skulle ikkje då vår Gud som er god svare på pågåande bønn frå oss, kommenterer Fagervik.

Bønn

Tidleg på 2000-talet var han med å grunnlegge Nordisk Bønnesenter i Levanger. Der har dei ein fast, dagleg bønnerytme som går gjennom heile veka.

Trass i at Fagervik heile livet har reist rundt som evangelist, meiner han det å be har vore det viktigaste arbeidet han har lagt ned for Guds rike.

– Bønn står i kjernen av kva det vil seie å vere kristen, fordi gjennom den blir trua halden i livet, seier han.

Den omreisande evangelisten meiner alle kristne er kalla til å alltid be, slik Jesus oppmodar til i søndagens tekst. Likevel er det mange ulike måtar å be på.

Bønn handlar om å vende heile livet mot Jesus. Sjølv om ein ikkje alltid greier å be bevisst, kan den indre anden alltid vere i bønn, ifølge Fagervik.

– Sjølv går eg og mumlar på Jesu namn dagen lang, seier han.

Vekking og bønn

Fagervik meiner det er viktig at kristne held ut i bønn, trass i at dei ikkje får noka bønnesvar.

– Gud har lova at lønna for uthalden bønn er at han vil gripe inn, seier Fagervik.

Som omreisande evangelist har han nemleg lagt merke til eit mønster.

– Nesten kvar gong eg har sett eit gjennombrot eller ei vekking, har det vore nokon som har bedd for staden over lengre tid. Eg som evangelist har berre vore med å forløyse det bønnearbeidet har bygd opp til, seier han.

Hun skulle på dans, men havnet på vekkelsesmøte

Difor har bønnesenteret i Levanger ei rekke konkrete stader i Norge dei har bedd for over lengre tid. Fagervik trekker fram Oslo som dei har hatt på agendaen i rundt 20 år.

– Når vi ber for Oslo, er vi med i ein kamp rundt byens sjel. Eg trur konsekvensen av det på sikt kan vere at vi får oppleve ei ny vekking i hovudstaden, seier han

Bønn er meir enn ord

Ingrid Benedicte Mella har vore engasjert i bønnearbeid lenge, og har mellom anna vore lærar på Filadelfia Bibelskole der ho har undervist om temaet.

For Mella er det ein samanheng mellom bønn og korleis det står til med den enkelte sitt trusliv.

– Bønn handlar om å ha fellesskap med Gud. Dersom vi trur det er sant som det står i Apostelgjerningane, at det er i Gud «vi lever og rører oss og er til», så vil heile livet vårt vere ei bønn til Gud. Difor er bønn og tru uløyseleg knytt saman, seier ho.

Samtidig understrekar Mella at bønn ikkje kan avgrensast til bønn med ord eller bønn på innsida. Når Jesus i søndagens tekst oppfordrar disiplane til å alltid be, er det difor ikkje meint som at dei alltid skal gå og be høgt med ord, ifølge Mella.

– Bønn er all kommunikasjon mellom oss og Gud. Det kan handle om å vende vårt indre blikk mot Gud, noko vi til dømes kan gjere gjennom å be med ord eller song, seier ho og legg til:

– Samtidig kan vi også gjere det gjennom å tenke på Gud og hugse på han. Til og med å puste inn og ut mens vi er bevisst på at livet kjem frå Gud og at vi er til for han kan vere bønn, seier ho.

Har du tips til ei historie eg bør skrive om?

Daniel Kydland

Journalist

Eg er interessert i sterke historier fra kristen-Norge. Har du du tips til ei historie eg bør skrive om eller tankar om denne saka, er du velkommen til å kontakte meg.

Send meg en epost Ring meg: 97728937